إزاي أقدر اتحكم في الشهيه في ٣ خطوات ؟
ناس كتيره بتشتكي إن نفسها بتكون مفتوحه علي الأكل و إنها مش بتقدر تظبط كميات أكلها.
الحل إيه
١- إني احافظ علي مستوي الإنسولين في الدم
عن طريق اني أكل بروتين و دهون بكميات معتدله
و أبعد عن النشويات من عيش و رز و مكرونه لإن ده الي بيستفز الإنسولين. و استمد احتياجي للنشويات من الخضار و قليل من الفاكهه.
لو انتي مقتنعه انك مانعه السكر و لكن بتاكلي عيش و كيك ...
فعايزه أوضح بس إن رغيف العيش الوسط (تقريبا ١٢٠ جرام) فيه حوالي ١٥ معلقه سكر!!!
ففي ما يسمي بالسكر الخفي
٢- النوم المنتظم من ٦-٨ ساعات
لإن قله النوم بتعمل خلل هرموني و منهم هرمون الليبتين المسؤول عن الشبع فبالتالي بتفضلي طول اليوم حاسه انك عايزه تاكلي
٣- تقليل الضغط النفسي و التوتر
لإنهم بيرفعوا مستوي هرمون الكورتيزول و بيخليكي دايما عندك الرغبه في أكل النشويات ....( علشان كده كتير مننا لما بيكون مضايق بيفضل رايح جي علي التلاجه لحد ما يخلص الي فيها)
في نقطه مهمه
لو مش قادره تتحكمي في شهيتك أو كميات أكلك ده مش ضعف إراده منك و لا مشكله فيكي انتي
المشكله في نوعيات الأكل نفسها الي بتاكليها
- -هي الي بتضعف من طبيعه حرقك للدهون
- -هي الي بتزود شراهتك في الأكل
- -هي الي بتخليكي فاقده الطاقه و القدره علي الإنجاز
- -هي سبب رئيسي في ضغطك النفسي و عدم رضاكي عن شكلك
و للأسف ده الي بيخلينا نجري ورا أي نوع دايت أو حل سريع من أدويه او غيره بيقنعك إنه هيخسسك من غير تعب و في وقت سريع!
و ده أكيييد هيخسسك بشكل مؤقت و هيضر معاه حاجات تانيه كتير
و علشان كتير مننا تعب من الحل السريع الغير مستديم
محتاجين نتعلم إزاي أقدر ابني عادات صحيه تستمر مدي الحياه
تديني طاقه
و يكون هضمي أحسن
مناعتي أقوي
متحكمه في أكلي مش هو المتحكم فيا
نفسيتي أفضل
نشاطي أعلي
و كمان أوصل لشكل الجسم الي بيرضيني
مش بديكي دايت مؤقت و لكن بديلك أسلوب حياه صحي تقدري تستمري عليه مدي الحياه و تطبقيه علي الي حواليكي , وعشان تتعلمي دا وتفهميه مش هايكفيكي مقال واتنين تابعينا في المقالات القادمه واقرئي المقالات الخاصه بالسيدات داخل موقعنا وتابعي القادم من الموضوعات والفيديوهات .
تعليقات