| -->
fitness eg موقع فيتنس مصر fitness eg موقع فيتنس مصر
التخسيس وحرق الدهون

أهم المقالات

التخسيس وحرق الدهون
جاري التحميل ...

الجسم المثالي : 30 قاعده في التمرين والدايت للمبتدئين للحصول علي أفضل شيب ممكن للجسم

علشان توصلي لمرحلة تحول  لشكل جسمك  لازم  توصلي لمرحلة تحول لشكل حياتك الاول

تستمري علي الاكل الصحي والرياضه كأسلوب لحياتك مش لفتره مؤقته
وعشان تحققي التحول دا في حياتك لازم تكوني مقتنعه بالقواعد اللي هقولهالك في السطور الجايه



1- احنا بشر مش اجهزه كمبيوتر ( يعني كل واحد ليه ظروف ومواعيد ونظام في حياته مختلف عن التاني ولازم يراعي ده في نظامه الغذائي والرياضي علشان يقدر يستمر )

2- اهم شئ تظبيط اكلك في حدود سعراتك .

3- الدايت اسلوب حياه مش فتره وهترجعي تاكلي تاني براحتك ( ومفيش نظام اسمه تثبيت وزن )

4 - شرب الميه مهم جدا سواء عامله دايت او من غير دايت .

5- مفيش مشروبات سحريه بتحرق الدهون  ( اغلبها بتساعد في زياده معدل الحرق ومدرات بول مش اكتر )


6- كل ادويه حرق الدهون ليها اعراض جانيه اكترهم بيرفع الضغط ويزود نبضات القلب من الاخر قلتها احسن 

7- ممارسه الرياضه هتساعدك في نزول الوزن وشد جسمك وتحسين صحتك مع النظام الغذائي 

8- ينفع بدون ممارسه رياضه تخسي عادي جدا بس مش هيبقي جسمك مشدود وهيبقي الموضوع اصعب شويه . 

9- شرب الميه مهم جدا بلاش تنساه . 

10- ممارسه الرياضه مهمه لصحتك ونشاطك وحياتك مش اوبشن بتعمليه علشان تخسي فقط 

11- مفيش نوع اكل معين بينزل الكرش ولا اي مشروب معين بينزل منطقه معينه من جسمك جسمك ليه طبيعه معينه بناء عليها هيخس حسب مزاجه هو وغالبا اول منطقه بتزيد هي اخر منطقه بتخس ) 

12- كتر الاكل خصوصا لو اكل غير صحي حتي لو حضرتك مش بتتخني اصلا هو السبب الاول في كل امراض العصر من ضغط وسكر ودهون علي الاعضاء الداخليه 

13- ممارسه الرياضه مهمه جدا لحياتك حتي لو انتي ارفع من الضيف احمد  

14- مفيش اي اكل ممنوع نهائيا ( بس في اكل صحي واكل غير صحي ) 

15- مش لازم تبطلي نشويات (كاربوهيدرات ) علشان تخسي اهم شئ تلتزمي بسعراتك الحراريه لو عاوزه اسهل طريقه لحساب السعرات وباللغه العربيه اضغطي هنا - حساب السعرات الحراريه

16 - مفيش اكل بيخسس ولا اكل بيتخن ولا اكل بيثبت الوزن المهم اكل في حدود سعراتي بس في اكل صحي واكل غير صحي ممكن يضرني ويجيبلي امراض . 

17- (قاعده الفيل : لو الفيل ابو زلومه طلع مناسب لسعراتك كله بشحمه ولحمهه مش هتتخن )

18- شاي رويال بيعمل اسهال واستخدامه في التخسيس كارثه صحيه اقل شئ هيعملك انيما وتكاسل في الامعاء 

19- الشاي الاخضر بيساعد في زياده معدل الحرق بس مش بالصوره الي انت متخيلها كوبايه او 2 منه في اليوم ممتاز جدا ولو مش بتحبه اشرب شاي اسود كويس برضو بس الاخضر افضل شويه .

20- مفيش فرق بين السكر الابيض والسكر البني في السعرات وبرضو سكر الفركتوز سعراته عاليه ( استخدمي سكر دايت ) 


21- البروتين لو كلت منه كتير هتتخن برضو وهيتحول دهون عادي جدا لان اي سعرات زياده عن سعراتك هتتحول في جسمك لدهون 

22 - اكل المطاعم هو اقصر طريق للمستشفي من الاخر ولا نظافه ولا مكونات نظيفه تجنبوه

23 - مش مهم تمارسو الرياضه الصبح ممكن الظهر او العصر او حتي بليل اهم شئ الاستمرار علي ممارسه رياضه بلاش تعقيد 

24- لو بوظتو وجبه او يوم في الدايت عادي والله ارجعي لنظامك الغذائي بسرعه في اقرب فرصه دا اسمه دايت مش راديو ولا كاسيت هيبوظ ومحتاج يتصلح 

25- شرب الميه ياجماعه ابوس ايديكو اشربو ميه

26- الالتزام بالسعرات ياجماعهابوس ايديكو اتزمو بسعراتكو

27- ممارسه الرياضه باستمرار ياجماعه الاستمرار هو كلمة السر في اللعبه دي

28- مفيش حاجه اسمها امنع الدهون تماما علشان اخس جسمك محتاج نسبه دهون صحيه في حدود سعراتك طبعا تقدري تستخدمي دهون زي زيت زيتون او عباد او كانولا او ذره او مكسرات 

29- النظام الغذائي زي الامتحان كل ما تلتزم اكتر النتيجه هتكون احسن وكل ما تلغبط ممكن توصلي لدرجات السقوط لكن مش كل البشر ماشيين 100% حاولي تبقي في مستوي الجيد او الجيد جدا المهم تنجحي وبلاش تعقيد 

30- الاستمرار علي الحياه الصحيه اهم من الحياه الصحيه نفسها فحاولي ديما تتعلمي تعملي اكلك وتتعودي تمارسي الرياضه وتخليها لايف ستايل مش فتره مؤقته


ÇáÊÚáíÞÇÊ
0 ÇáÊÚáíÞÇÊ

-

موقع فتنيس مصر هو موقع متخصص في شرح المعلومات الرياضيه والتغذيه الصحيه بأبسط طريقه ممكنه , نستهدف دائما تبسيط المعلومه وتجنب المصطلحات المعقده - تابعونا وشكرا لكم

جميع الحقوق محفوظة

fitness eg موقع فيتنس مصر

2018