الصيام المتقطع لانقاص الوزن و حرق الدهون | فوائد واضرار رجيم الصيام المتقطع

نظام الصيام المتقطع اصبح من الانظمة المنتشرة مؤخرا وكتير من الناس بيشكروا فيه وبيقولوا انت نتائجه مرضية بالنسبة للتخسيس لكن الاغلب ميعرفش كتير عن النظام , وفي المقال دة هنوضحلكم كل شيء يخص الصيام المتقطع

نظام الصيام المتقطع هو
 الصيام لفترة طويلة كل يوم شبه صيام رمضان وبتاكل وجباتك في وقت اقل (الوقت المحدد) في اكتر من نوع من نظام الصيام المتقطع لكن أشهرهم نظام ال 16/8 و معناه انك بتاكل وجبتين أو ثلاث وجبات في حدود 8 ساعات 

الصيام بيكون 16 ساعة كمثال للنظام ده من الصيام المتقطع ان ميعاد اكلك بيبدأ من 3 العصر وينتهي 11 ليلا وبيكون هو دة الميعاد المسموح لك فيه بتناول الطعام فقط
 وتصوم الى اليوم التاني للساعة 3 العصر وهكذا و تكرر الصيام . عشان كدة ذكرت ان نظام الصيام المتقطع يشبه صوم رمضان لكن الفرق ان في النظام دة مش بتصوم عن السوائل

-

نوع تاني للصيام المتقطع لكن مش بشهرة النظام اللي ذكرته فوق زي نظام صوم 20 ساعة بمعنى بتاكل وجباتك غالبا بتكون وجبة او وجبتين خلال 4 ساعات

النوع الثالت هو انك تصوم يوم كامل عن الاكل وتاكل بحرية اليوم اللي بعده وهكذا

نبدأ ب فوائد نظام الصيام المتقطع لكن قبل ما نتكلم فيها لازم اقول ان كل الفوائد الموجودة جائت من دراسات قائمة على الفئران ومش البشر وكمان في كتير من الفوائد اللي هنذكرها سببها بيكون منع الاكل فترات اطول

فوائد نظام الصيام المتقطع :

1) بيعمل على زيادة هرمون النمو وبيترتب عليه بناء معدل عضلات اعلى بالتالي حرق دهون بصورة افضل
2) بيزود معدلات الاستشافاء لانه بيحفز اصلاح الخلايا التالفة وبيقلل من التهابات العضلات
زيادة معدل حرق الدهون عن طريق انخفاض هرمون الأنسولين في الدم
3) بيقلل الكورستيرول الضار في الجسم
4) بيخض فرص الاصابة بالسرطان
5) بيخسن صحة القلب
6) بيمنع الاصابة بالزهايمر

ملحوظة على نظام الصيام المتقطع
: في حالة عدم التزامك بالسعرات المحددة ليك مش هتخس بسبب الصوم فقط لازم حساب سعرات ايضا

ايه هي سلبيات نظام الصيام المتقطع ؟

زي ما ذكرنا الفوائد كمان لازم تعرف الاضرار والاثار الجانبية

1) تناول كميات كبيرة من الاكل بشراهة
الصوم لفترات طويلة ممكن يخليك تجوع بشراهة وتاكل في باقي يومك سعرات حرارية اعلى من المطلوب بسبب الشعور بالجوع فترة طويلة

2) ممكن يسبب ادمان على الكافيين
بما ان السوائل مسموحة في الصيام المتقطع زي الشاي والقهوة بدون حليب او سكر لو كترت من شربهم ممكن تدخل في ادمان الكافيين وده له اضرار كتير لوحده منها الاضطراب والتوتر والعصبية والارق في النوم

3) ممكن يسبب حرقة في المعدة في الاسابيع الاولى من اتباع الصيام المتقطع

بكدة نستنتج ان نظام الصيام المتقطع هو مجرد نظام لتنظيم مواعيد الوجبات لانك هتحسب سعراتك واكلك كما الحال في اي نوع دايت لكن ممكن تكون مناسبة لبعض الاشخاص وممكن لا في النهاية العبرة بمجموع السعرات ومفيش دايت معين بيخسس عن غيره لان عجز السعرات هو المتحكم الاول في انقاص الوزن سواء في دايت الصيام المتقطع او غيره

لكن لو شايف ان نظام الصيام المتقطع مناسب ليك او حابب تجربه لفترة لازم تتبع وتعرف النصائح دي :

1- تناول الياف كتيرة
تناول الخضروات والفاكهة ضروري جدا عشان يخلي الجسم يشعر بالشبع لفترات اطول ومتاكلش بشراهة خلال فترة عدم صيامك

2- لا تتناول اكثر من فنجانين او 3 بالكتير شاي وقهوة بالاخص بعد السادسة مساءا لان الكافيين بيسبب ارق

3- حاول دائما تنوع في اكلك ما بين البروتين زي صدور الدجاج واللحوم الحمراء والشوفان والبيض والالبان والدهون الصحية زي زيت الزيتون والسمن الحيواني والمكسرات والكاربوهيدرات الصحية اللي هتمدك بالطاقة زي البطاطا والبطاطس والارز والمكرونة والالياف زي البروكلي والخس والخضروات عموما

4- النظام لا يناسب الاطفال وكبار السن ومرضى السكر والحوامل والمرضعات

5- نظام الصيام المتقطع مش هيخسرك عضلات في حالة اخذت احتياجك من البروتين كامل واهتميت بتمرينك وممكن تتمرن خلال الصيام بشرط اول ما تخلص تمرين تتناول وجباتك بمعني ممكن تتمرن في اخر ساعات صيامك بحيث تتناول وجباتك بعدها

كدة نكون خلصنا نظام الصيام المتقطع في النهاية اذا كنت مش شايفهه مناسب ليك او مواعيد عملك او طبيعة يومك مش هيعمل فرق كبير تقدر تتبع دايت متوازن وفيه عجز سعرات حرارية .