رجيم صحي لمدة شهر لحرق دهون الجسم - مثال لوجبات الدايت ليوم كامل | نظام غذائي 1500 سعر حراري

لو احترتي بين انظمة الدايت المختلفة والوجبات او مش عارفة ازاي تنظميها هنساعدك ونديكي نظام للدايت كمثال 1500 سعر حراري لكن تقدري تعدلي عليه على حسب احتياجات جسمك من السعرات الحرارية (موجود في الموقع كيفية حساب احتياجات جسمك  من هنا )

و اليكم رجيم صحي = 1500 سعر حراري

الافطار :
50 جرام شوفان نيء + 50 جرام كورن فليكس سادة
150 مل لبن كامل الدسم
20 جرام فول سوداني
10 جرام زبيب
(تحطي الشوفان مع اللبن على النار لمدة 5 دقائق بعدين ضيفي الزبيب والفول السوداني )

الغداء :
100 جرام ارز ابيض مسلوق
200 جرام صدر دجاج (الوزن قبل الطهي)
50 جرام فاصوليا كوسة
50 جرام خيار او بروكلي
(تقدري تضيفي صلصة طماطم تعمليها بدون زيت للخضار)

وجبة بعد التمرين :
120 جرام تونة مصفاة من الزيت
100 جرام جرجير او خس
75 جرام جزر

وجبة قبل النوم : (يفضل قبل النوم بساعة عشان الهضم)
100 جرام جبنة قريش
80 جرام خيار
75 جرام بيض مسلوق (صفار وبياض البيض)

معلومات النظام الغذائي :
1503 سعر حراري
129 جرام بروتين
141 جرام كاربوهيدرات
46 جرام دهون
15 جرام ألياف

ملاحظات مهمة :

1- متنسيش تحسبي احتياجات جسمك من السعرات الحرارية وتقدري تعدلي على الجدول على حسب احتياجاتك لان الاحتياجات بتختلف من شخص لاخر باختلاف السن والنشاط والوزن الخ..

تقدري تغيري في الدايت في الحدود المسموحة كل فترة من غير مشاكل اهم شيء تحسبي سعراتهم الحرارية

2- متنسيش تاخد وجبة مفتوحة كل 10 ايام او اسبوعين على حسب هدفك ويفضل تكون عالية الكاربوهيدرات والبروتين واقل في الدهون لانها مهمة لعدم ثبات الوزن بتملى مخازن الجلايكوجين لكن بتكون وجبة واحدة مفتوحة مش يوم كامل عشان متتفأجيش ان وزنك بيثبت ومش بتخسي

3- متوزنيش نفسك بعد الوجية الفري بيومين لان امتلاء مخازن الجلايكوجين في الجسم بيؤدي الى زيادة مياه الجسم لمدة قليلة بالتالي زيادة كيلو او 2 كيلو جرام على الميزان لكن هيروح تاني بمجرد ما تنتظمي في النظام الغذائي من تاني

4- اشتري ميزان الطبخ عشان تكوني دقيقة في اكلك موجود في محلات الادوات المنزلية

5- تقدري تستخدمي فيتامينات زي مكمل المالتي فيتامين والاوميجا 3 بلس من الصيدلية لضمان وصول احتياجات جسمك كاملة

6- مسموح شرب السوائل الساخنة بالسكر الدايت او البيبسي والسيفن اب الدايت لكن متكتريش من البيبسي الدايت لانه بيحتوي على مادة الفسفوريك ودي بتقلل امتصاص الكالسيوم من الجسم بالتالي ممكن يحصل هشاشة في العظام على المدى البعيد

7- اشربي مياه كتير في يومك لا يقل عن 2-3 لتر يوميا لانها هتحافظ على نضارة بشرتك وشعرك وهتعلي من معدل الحرق وهتخليكي انشط

8- زودي معدل حرقك عن طريق زيادة نشاطك في اليوم يعني ممكن تطبخي اكلك بنفسك او تساعدي في شغل البيت بجانب التمرين في الجيم بالاوزان لافضل نتيجة