شورت التخسيس وحزام التخسيس كما يروجون
انتشر كلام كتير حول احزمة التنحيف وانها بتساعد في
انقاص الوزن والتخلص من الدهون
وظهرت انواع مختلفة من احزمة التخسيس منها الحزام العادي ، الحزام الحراري ، الحزام الكهربائي ،الحزام الهزاز ولكن كلهم يعملوا على نفس الهدف وهو زيادة التعرق في المنطقة المستخدمة
الحزام الحراري مهمته انه يخلي الجسم يتعرق اكتر وبيتلف على اكثر من منطقة للجسم لكن اكترهم انتشار هو البطن
-
فكرته انه بيرفع درجة حرارة المنطقة اللي عليها الحزام بالتالي هيخليكي تعرقي اكتر وتخسي على حسب كلام الشركات المنتجة
لكن نعرف الحقيقة ان العرق ليس له علاقة بالتنحيف او خسارة الوزن العرق هو فقدان مياه فقط بمجرد ما تشربي مياه بعدها هترجعي المياه اللي فقدتيها لجسمك تاني والمطلوب هو فقدان الدهون
اراء الناس التي استخدمت الاحزمة التنحيفية و شورت التخسيس
كتير منهم بيقول ان الاحزمة عملت نتيجة لكن تم ذكر انهم كانوا متبعين نظام غذائي وتمرين يوميا بجانب استخدام الحزام وهنا الشركات المنتجة للاحزمة الحرارية او التنحيفية بتروج لمنتاجتها بتأييد من اغلب المستخدمين اللي جربوا الاحزمة
وكان رأيهم في صالح الاحزمة دي
لكن الحقيقة انهم كانوا متبعين نظام غذائي ورياضة وهو دة السبب في
خسارة الوزن مش استخدام الاحزمة لان زي ما ذكرنا العرق ليه له اي صلة بحرق الدهون هو مجرد مياه يفقدها الجسم خلال نشاط بدني
وبمجرد شرب المياه مرة اخرى تعود الى الجسم
بالنسبة لباقي الاراء اللي كانت غير مؤيدة ان الحزام الحراري ملهوش فاعلية ده بسبب ان المجموعة اللي قالت كدة مكانتش متبعة نظام غذائي او رياضة نستنتج من الكلام دة ان العامل الرئيسي لخسارة الوزن هو اسلوب الحياة الصحي والنظام الغذائي اولا ثم التمرين مش احزمة التنحيف واللف والكلام دة ...
بما ان احزمة التنحيف طلعت ملهاش اهمية
ازاي اعمل دايت لنفسي ؟
الدايت هدفه يقلل نسبة الدهون في جسمك والدهون في الجسم هتقل لما تدخلي سعرات لجسمك اقل من احتياجه او بيسموه عجز سعرات ودي بقلل فيها من 300 الى 500 كالوري عن احتياجك اليومي من السعرات الحرارية
(موجود طريقة حساب احتياج الجسم من السعرات على الموقع) من
هنا
و
زيادة نسبة العضلات هتكون ضرورية لاعطاء الجسم شكل متناسق ميكونش رفيع جدا بعد خسارة الدهون
لما تعرفي احتياج جسمك من السعرات هتشتري ميزان طبخ عشان تعرفي السعرات الحرارية اللي فالاكل بدقة وتعرفي جسمك دخله قد ايه وفاضل له قد ايه من الاكل
طيب عرفت ازاي احسب السعرات ايه نوعية الاكل اللي تاكليها؟
نظامك الغذائي لازم يكون صحي
يعني تبعدي عن البيبسي والشيبسي والحلويات والمقليات والاكل السريع واكل المطاعم لان كل دي اكلات مليانة بالدهون والسكريات جسمك مش هيستفاد بيها وهتزودك دهون بالتالي هتلاقي النتيجة مش كويسة وممكن يحصل ترهل وتتفاجئي بترهل بعض الاماكن في جسمك
طيب ايه الحل؟
الحل انك تقسمي سعراتك على البروتين والكاربوهيدرات والدهون الصحية
البروتين العالي
هتلاقيه في اكلات زي صدور الدجاج والاسماك واللحوم الحمراء الغير مصنعة والبيض واللبن والجبن القريش والفول السوداني والعدس والحمص الخ...
الكاربوهيدرات النظيفة اللي تاكلي منها :
الارز والمكرونة والشوفان والذرة مشوية او مسلوقة وبرضو العدس والبليلة والبطاطس والبطاطا والخبز الاسمر
وابعدي عن الخبز الابيض والمعجنات والسكر والبيتزا
الدهون الصحية :
ضرورية للجسم هتلاقيها في زيت الزيتون والمكسرات زي اللوز والفول السوداني والكاجو والفستق والسلمون والافوكادو
تقدري تعرفي القيمة الغذائية لاي اكل (البروتين والكاربوهيدرات والدهون) من تطبيقات كتير على الانترنت او من جوجل
ازاي اتمرن ؟
اتمرني بأوزان كل مناطق جسمك مش منطقة معينة عشان يحصل تناسق وتبني العضل اللي هيشد الجسم
التمرين بالاوزان مهم جدا جدا جدا هيدي لجسمك مظهر متناسق ممشوق ويزود الكتلة العضلية اللي هتزود معدل حرقك وتخلي مظهر جسمك جمييل وممشوق وعلي هذا الرابط تجربتي الشخصيه بالتمرين في البيت وشرح
كيف تبدئي
ممكن تتبعي نظام تدريب Upper Lower
باستخدام وزن متوسط كبداية وبعد كده تزودي اوزان تدريجيا وفكرته انك تمرني عضلات جسمك العلوية في يوم وعضلات جسمك السفلية (الرجل) في يوم تاني وتكرري ومتوفر تمارين كتير على الانترنت اختاري تمرينين الى 3 لكل عضلة كبيرة(صدر \ظهر )
ومن تمرين الى 3 للعضلات الصغيرة (الباي \التراي \الكتف )
(الباي والتراي هم تمارين الذراع )
و6الى 8 تمارين في يوم الرجل
كمان عامل مساعد لتنزيل الدهون لكن متزوديش جدا منه يكفي ممارسة الكارديو 3 -4 مرات اسبوعيا مدة من 15 الى 30 دقيقة
معاد التمرين يكون اي وقت تقدري تنتظمي عليه ولازم التمرين يكون قبله اكلتي وجبة متكاملة(الغداء او الفطار) وتتمرني بعدها بساعة ونص على الاقل ويكون بعده وجبة تاني متكاملة
اتمرني البطن يومين او 3 بالاسبوع ويكون في بينهم راحة
اهتمي بالراحة والنوم :
لازم تحرصي على النوم من 6 الى 10 ساعات ليلا لان الجسم بيعيد بناء الخلايا اللي اتهدمت في التمرين اثناء النوم خصوصا ليلا
متى استخدم المكملات والفيتامينات ؟
ممكن تستخدمي بعض المكملات عشان تضمني لجسمك انه وصله النسب اللي محتاجها من الفيتامينات زي المالتي فيتامين واوميجا 3 ودول متوفرين في الصيدليات .
