رياضة المشي وفوائدها
بنات كتير بتكون عايزه تمارس رياضة عشان تنقص وزنها او تحافظ على صحتها ونفسها تمارس رياضة تحرق بيها سعرات وتفيد جسمها لكن مش بيكون عندها وقت كافي تشترك في نادي او جيم او مش متوفر لها ... رياضة المشي مش بتحتاج مكان معين او اشتراكات او وقت معين وكمان مهمة جدا للحفاظ على صحة القلب وتنشيط الدورة الدموية وليها فوائد كتير جدا
ايه هي السرعة المطلوبة في رياضة المشي ؟
مفيش سرعة معينة نقدر نقول عليها ملهاش لازمه بالعكس اي سرعه حتي لو مشي عادي ليه نفس الفوائد لكن كل ما تسرعي كل ما تحرقي سعرات حرارية اكترعشان كده بننصح الناس اللي عندها وزن زايد تمشي بخطوة اسرع لحرق سعرات حرارية اكتر لكن الدراسات لقت ان اي سرعه للمشي ليها نفس الفوائد الصحية بيقللمن مشاكل القلب ويحسن ادائه والشرايين وبيساعد في تقليل احتمال الاصابه بمرض السكر
ما هي فوائد المشي ؟
1- المحاظة على الجسم بحالة سليمة وصحية لوقت اطول
في دراسات لقت ان الاشخاص اللي محافظين على رياضة المشي بانتظام بتقل عندهم نسبة الوفيات وبتقل عندهم فرص الاصابة بالسرطان والسكتات الدماغية والقلبية
2- المشي يحمي من زيادة الوزن
مش بس الناس اللي عايزه تخس هي اللي تمارس المشي ، كمان الناس اللي وزنها مثالي او بتثبت وزنها المشي رياضة مثالية ليهم لانه هيقلل عندهم فرص الاصابة بالسمنة وزيادة الوزن
3- المشي يقلل من فرص الاصابة بالسرطان
الناس اللي بتحافظ علي رياضة المشي بانتظام بجانب التمارين الرياضية حتى لو خفيفة لقوا ان فرص الاصابة بالسرطان عندهم اقل من الاشخاص اللي مش بيمارسوا رياضة وبتحمي الجسم من الاصابة ببعض السرطانات زي سرطان الثدي والقولون
4- تقليل فرص الاصابة بمرض السكر بالمشي
عشان تحمي نفسك من مرض السكر المشي هيكون اختيار مثالي ليك بجانب ممارسة بعض التمارين الاخرى بانتظام
5- المشي ينشط الدورة الدموية في الجسم
المشي او اي مجهود بدني متوسط بينشط الدورة الدموية في الجسم لكن المشي بانتظام كمان بيقلل نسب الكوليسترول الضار في الجسم وبيحميك من الاصابة بالسكتات القلبية والدماغية وامراض القلب
6- المشي يقوي الذاكرة
في دراسات لقت ان المشي يوميا بانتظام بيحسن وظائف المخ بشكل كبير مما يترتب عليه تقوية الذاكرة واداء المخ لوظائفه بشكل افضل
7- المشي يخفف التوتر والضغط
ممارسة المشي بتحفز افراز مادة الاندورفين في الجسم ودي دورها مهم جدا للجسم لانها بتخفف الضغط البدني والعصبي وبتقلل من الاحساس بالتوتر والضغط
بعض النصائح المهمة للمارسة رياضة المشي بأفضل شكل :
- 1- ممارسة المشي في اي وقت اكيد مفيدة لكن في الصبح في الشمس المعتدلة هيكون افضل لانك كمان هتخصلي على فيتامين د من اشعة الشمس المفيد جدا لجسمك وضروري لعمليات كتير ، ابعدي عن المشي في وقت الظهر او في الاوقات اللي بتكون فيها الحرارة عالية
- 2- امشي بالتدريج ابدأي بسرعات بسيطة وزودي كل مرة هيساعدك جدا في خسارة الوزن
- 3- متمشيش بعد الاكل مباشرة استني من ساعة لساعتين عشان الاكل ياخد وقته في الهضم وميحصلش مشاكل او خمول
- 4- اشربي مياه قبل واثناء وبعد ممارسة المشي ولكن اثناء المشي اشربي رشفات متقطعة
- 5- نظمي نفسك ، خدي شهيق وزفير بشكل منتظم وبشكل كامل ده هيساعدك انك متحسيش بوجع في الجنب اللي كتير بيشتكوا منه
- 6- افردي جسمك خلال المشي وارفعي راسك في مستوي جسمك ده هيساعد عضلات جسمك تشتغل بشكل افضل ويحميكي من تقوس الظهر ويعالجه
- 7- البسي ملابس مناسبة للرياضة تكون ملابس قطنية خفيفة وابعدي عن الملابس الصناعية الثقيلة
