ما هو الواي بروتين وما فوائده وما هي انواعه وسعر الواي بروتين 2018
الواي بروتين من اكتر المكملات الغذائية اللي واخدة شعبية كبيرة جدا في العالم كله لكن الواي بروتين في ناس بتعتبره سحر مع انه مجرد مكمل لاحتياجك اليومي من البروتين وده هنشرحه بالتفصيل لكن حبينا نبين انه بروتين عادي جدا زيه زي بروتين صدور الدجاج او البيض او اللبن البروتين عموما ضروري لجسم الانسان ومهم لحاجات كتير في الجسم منها الشعر والاظافر والجلد وعمليات حيوية تانية مش بس مفيد للعضلات
ما هو الواي بروتين ؟
الواي بروتين ده مستخلص من اللبن او مصل اللبن بيجي بعد ما اللبن او شرش اللبن ما يمر بكذا مرحلة مستخلص طبيعي منه وبتكون اخر مرحلة اللي هي التجفيف
وده اللي بيخليه يبقي "بودر" زي ما بيتباع في محلات المكملات في السوق وبيتضاف عليه نكهات زي الشوكلاتة والفانيليا والفراولة والموز...
ما هي فوائد الواي بروتين ؟
زي ما ذكرنا ان الواي بروتين هو مجرد مكمل طبيعي لاحتياجك من البروتين وتقدر تجيبه من الاكل لكن اكيد ليه بعض الفوائد منها انه بروتين جودته عالية وفيه احماض امينية كتير
زي الBCAA والليوسين ودول بيحافظوا على العضلات من الهدم وكمان ناس كتير بتتجه انها تشتري المكملات دي مع انها موجودة بوفرة في الواي بروتين او البروتين عموما
يعني مش هتحتاج تشتري مكملات BCAA لو بتاخد احتياجك كفاية من البروتين سواء من الاكل بس او من الاكل والواي
كمان البروتين بيدي احساس بالشبع مدة اطول
وكمان بيخليك متفقدش عضل لو بتعمل دايت وبتخس وده اللي يخليه مثالي للناس اللي عايزة وزنها يقل بدون خسارة عضلات سواء تخسيس او تنشيف كمان الواي بروتين قليل السعرات والدهون وده بيخليه مثالي للتخصيس والتنشيف
والاشخاص اللي بيعانوا من النحافة كمان
البروتين ضروري تجمعه من اكلك ولو مش بتقدر تجمع احتياج جسمك هنا بتتجه انك تشتري واي بروتين وده هيساعدك تكمل نظامك الغذائي بالتالي هيديك زيادة عضلات بجانب نظام غذائي متكامل
الواي بروتين كمان بيكون مثالي لبعد التمرين لانه بروتين سريع الامتصاص ووصوله اسرع للعضلات
ما هي انواع الواي بروتين ؟
الواي بروتين فيه منه isolate وده بيكون 90% منه بروتين وفي concentrate وده بيكون 80% منه بروتين وفي cassien وده بيكون نوع بطئ الامتصاص مثالي لقبل النوم وايام الصيام لمنع هدم العضلات
Type
Protein
Lactose
Whey Protein Concentrate 1
25-89%
4-52%
Whey Protein Isolate
90-95%
0.5-1%
Hydrolyzed Whey Protein
80-90%
0.5-10%
بالنسبة لانواع الشركات الواي بروتين
فيه منه انواع كتير جدا في الامريكي او المستورد زي بروتين شركة ON او Muscle Tech...
وفي المحلي او المعبأ في مصر زي Gym Fit و ProtoFit وAdvanced sports و واي بروتين امتنان
ما هي طريقة استخدام الواي بروتين ومتي اتناول الواي بروتين ؟
الجرعات بتختلف من شركة لشركة لكن في العموم لازم تعرف احتياج جسمك من البروتين ولو تبقي 25 جرام بروتين مش قادر تكملهم من الاكل كمثال
هنا اخدهم من الواي بروتين 30 جرام من الواي بيكون فيهم غالبا 25 جرام بروتين و120 سعر حراري وتتأكد من العبوة طيب تاخده امتى ؟
مفيش فرق كبير في الاوقات الاهم انك تكمل احتياجك اليومي لكن يفضل بعد التمرين مباشرة مع مياه او لبن او الصبح عند الفطار
الواي بروتين بيتباع فين واسعاره في 2018 ؟
الواي بروتين بأنواعه بيكون موجود في محلات المكملات اشهرهم في مصر Max Muscle و TSS و Bodybuilding House ممكن تعمل بحث بأسمهم هيظهرلك العناوين والاسعار بتكون على حسب الشركة
بتتراوح عبوة الواي بروتين الكيلو الواحد بين 300 الى 1000 جنيه وقابل للزيادة على حسب انواع الشركات مفيش فرق كبير اشتري اللي مقدرتك المادية تسمح بيه
ما هي اضرار الواي بروتين ؟
الواي بروتين زي ما ذكرنا مجرد بروتين زيه زي بروتين الدجاج والبيض واللحوم يعني مش هرمون او منشط فملهوش اضرار طالما الشخص سليم صحيا
